İtaliya, Niderland və Çexiyada resessiya başladı

İtaliyada sərt qənaət siyasətinə etirazlar

Bir neçə Avropa ölkəsi texniki resessiya mərhələsinə qədəm qoyduqlarını elan ediblər

İtaliya Milli Statistika İnstitutu çərşənbə günü məlumat verib ki, Avropanın üçüncü ən iri iqtisadiyyatı – İtaliya texniki resessiya mərhələsindədir. 2011-ci ildə o, ardıcıllıqla iki kvartal mənfi iqtisadi artım nümayiş etdiriblər. Statistikaya görə, 2011-ci ilin üçüncü kvartalında İtaliyada ÜDM 0,2%, dördüncü kvartalda isə - 0,7 % azalıb. Niderlandda da 2011-ci ilin üçüncü kvartalında ÜDM 0,4%, sonuncu kvartalda isə - 0,7% azalıb. Bu isə hər iki ölkənin texniki resessiya yaşadıqlarını göstərir.  

Çexiyanın durumu nisbətən yaxşı olsa da, analoji zaman kəsimində ÜDM 0,1 və 0,3% azalıb. Ümumilikdə 2011-ci ildə ölkədə iqtisadi artım 1,7% yüksəlib. Çexiya avrodan istifadə etməsə də, onun əsas ticarət tərəfdaşı Almaniya və digər Avropa Birliyi ölkələridir.    

Almaniyadan sonra Avropanın ikinci iri iqtisadiyyatı – Fransada ötən ilin sonuncu kvartalında  0,2% iqtisadi artım müşahidə olunub. Hərçənd analitiklər 0,2% eniş proqnoz edirdilər.   

Öz makroiqtisadi göstəricilərini Yunanıstan da elan edib. Avrozonanın ən problemli ölkəsində ötən ilin son kvartalında 7% təşkil edib. Yunanıstan üçüncü ildir ki, resessiyadan çıxa bilmir. 

Ötən ilin göstəricilərinə görə, iqtisadi eniş yalnız İtaliya ilə Niderlandda deyil, habelə İspaniya, Belçika və Portuqaliyada da müşahidə olunub. “Bloomberg” 42 iqtisadçının ekspert rəyinə əsaslanaraq, avrozonanın 17 ölkəsində iqtisadi artımın 0,4% azalmasını bildirir. 

Mütəxəssislərin fikrincə, resessiyanın müşahidə olunması ciddi problem deyil. Bu o zaman ciddiləşə bilər ki, prosess uzun çəksin. O zaman resessiya iqtisadi depressiya ilə əvəz oluna bilər. Resessiyanın əsas göstəricisi EDM olduğuna görə, problem ölkənin maliyyə problemləri və büdcə qənaəti ilə bağlıdır. Durumdan çıxmaq üçün sərt qənaət siyasəti elan edən bir sıra Avropa ölkələrində etiraz nümayişləri keçirilir.  

Salaminfo.az