İran Avropaya neft ixracını Avropa Birliyinin sanksiyaları qüvvəyə minmədən dayandıra bilər

İran parlamenti yanvarın 29-da Avropa ölkələrinə neft nəqlinin tam dayandırılması haqqında qanun layihəsini qəbul edə bilər.

"Financial Times”ın xəbərinə görə, bu barədə İran parlamentinin energetika komitəsinin təmsilçisi Emad Hüseyni açıqlama verib.

Onun sözlərinə görə, qanun layihəsi qəbul olunsa, o zaman İran hökuməti Avropaya neft satışını Avropa Birliyinin Tehrana qarşı sanksiyaları qüvvəyə minməmişdən əvvəl dayandıracaq.

İran parlamentinin digər deputatı Naser Sudani isə “Tehran Times”a açıqlamasında deyib ki, Qərbin İrana qarşı sanksiyaları bumeranq effekti verəcək: “Çünki Avropa ölkələri İran neftini heç nə ilə əvəzləyə bilməyəcəklər. Digər tərəfdən, İrandan neft idxalına embarqo qoyulması “qara qızıl”ın qiymətinin əhəmiyyətli dərəcədə artmasına gətirib çıxaracaq. Ona görə də avropalılar İran neftini vasitəçilər vasitəsilə almağa məcbur olacaqlar ki, bu da onların xərclərini kifayət qədər artıracaq”.

Qeyd edək ki, İranın Avropaya ixrac etdiyi neftin 68%-ni Yunanıstan, İtaliya və İspaniya alır. Ötən il Avropa Birliyi ölkələri İrandan sutkada 600 min barel neft alıb.

Yanvarın 23-də Avropa Birliyinə (AB) daxil olan ölkələrin xarici işlər nazirləri İranın nüvə proqramının maliyyə qaynaqlarını kəsmək məqsədilə bu ölkədən neft idxalına embarqo tətbiq olunması və İran Mərkəzi Bankının Avropadakı aktivlərinin dondurulması haqqında sənədi imzalayıb. Sənəd İrandan xam neft alışına dərhal qadağa qoyulmasını nəzərdə tutur. İndiyədək bağlanmış müqavilələr üzrə öhdəliklər isə 1 iyul 2012-ci ilədək yerinə yetirilməlidir.

APA