Salaminfo.AZ:  “İşğal edilmiş torpaqlar Azərbaycana qaytarılmadan bölgədə sülh mümkün deyil”

“İşğal edilmiş torpaqlar Azərbaycana qaytarılmadan bölgədə sülh
mümkün deyil”
================================================================================
salaminfo.az  on 02/09/2010/ 10:58
 
Türkiyənin xarici işlər naziri Əhməd Davudoğlu sentyabrın 1-də
ölkəsinin şərq vilayətlərinə səfər edib və Azərbaycan sərhədini
keçərək qısa müddət Naxçıvan Muxtar Respublikasında olub.
Ə. Davudoğlu Türkiyə-Ermənistan sərhədindəki Arpaçayda əllərini
yuyub.
Nazir jurnalistlərə açıqlamasında deyib ki, Ermənistan-Azərbaycan
ixtilafının həlli ilə Qafqazda sülh və sabitlik yaranacaq. O, bununla
bağlı məsuliyyətin daha çox Ermənistanın üzərinə düşdüyünü
söyləyib: “Azərbaycanın işğal altındakı torpaqları işğaldan
qurtulduqdan sonra qarşılıqlı olaraq Türkiyə-Ermənistan və
Azərbaycan-Ermənistan sərhədlərinin açılması ilə bölgəyə rifah
gələcək. İnşallah Arpaçay sülhün simvoluna çevrilər”.
Ə. Davudoğlu Dilucu sərhəd-buraxılış məntəqəsindən Naxçıvana keçib
və muxtar respublikanın rəsmi şəxsləri ilə görüşüb. Ə. Davudoğlu
burada verdiyi bəyanatlarda Ermənistanla sərhədlərin yalnız erməni
işğalına son qoyulmasından sonra açılacağını vurğulayıb. O,
Azərbaycanın xarici işlər naziri Elmar Məmmədyarova telefon edərək
Ermənistan və Azərbaycan ordularının təmas xəttində itkilərə səbəb
olmuş insidentlə maraqlanıb.
Dilucu sərhəd məntəqəsinin önəminə diqqət çəkən nazir bu nöqtənin
eyni anda Türkiyə, İran və Azərbaycan arasında keçid qapısı
olacağını bildirib. O, üç ölkə xarici işlər nazirlərinin bir neçə ay
ərzində bu bölgədə görüşəcəklərini deyib: “Daimi sülh əldə
edilərsə, bu torpaqlardan bərəkət fışqıracaq. Bu potensialdan
Ermənistan da yararlanacaq. Ancaq işğal edilən torpaqlar Azərbaycana
qaytarılmadan sülh mümkün deyil”. APA