Almaniyada yeni nəsl yaddaş cihazları hazırlanıb

Almaniyanın Yulix Tədqiqat Mərkəzinin və Maks Plank Mikrostrukturlar Fizikası İnstitutunun əməkdaşları növbəti nəsl yaddaş cihazlarının hazırlanmasına imkan verəcək kəşfə imza atıblar. Bu haqda müəlliflər “Science” dərgisində dərc etdikləri məqalədə xəbər veriblər. Onlar seqnetoelektrik materialda ilk dəfə təcrübi olaraq dipolların kəsilməz şəkildə fırlanmasını müşahidə ediblər. 

Qeyd edək ki, dipollar informasiyanı yadda saxlamağa imkan verir və onların kəsilməz fırlanması dairəvi strukturlarda yaddaşın reallaşdırılmasına yol açır. Belə strukturlarda dipolların yerləşdirilməsi isə nəticədə yaddaşın daha sıx şəkildə saxlanmasına gətirəcək.

Alimlər seqnetoelektrik olaraq Pb(Zr,Ti)O3 birləşmələrindən istifadə ediblər və müşahidələri keçirici elektron mikroskopunda aparıblar.

“PbTiO3 birləşməsi ilk dəfə 1950 – ci ildə sintez edilmişdir. 60 ildən çox keçməsinə baxmayaraq yenə də tədqiq edilir. Onun böyük maraq doğurmasının səbəbi sadə quruluşa malik olması və geniş temperatur intervalında öz seqnetoelektrik xassələrini saxlamasıdır. Buna görə də elm və texnika üçün çox yararlı birləşmə hesab olunur. Son zamanlar onun bir çox bərk məhlullarından müasir cihazlarda istifadə edirlər. Qeyd edək ki, atom – qüvvə mikroskopunun iynəsi məhz Pb(Zr,Ti)O3 bərk məhlulundan hazırlanır. Yeni müşahidə olunmuş bu effekt çox əhəmiyyətli bir hadisədir və yaddaş sistemlərinin hazırlanmasında radikal dəyişikliklərə gətirib çıxara bilər.” - Rusiyanın Birləşmiş Nüvə Tədqiqatları İnstitutunun Frank adına Neyton fizikası laboratoriyasının kiçik elmi işçisi seqnetoelketriklər üzrə aktiv tədqiqat aparan həmyerlimiz Sakin Cabarov bu xəbəri belə şərh edir.

İlmar Qəhrəmanov
Salaminfo.az